وكتير مننا كان واخد بطلة الفيلم { نجيبه متولي الخولي } قدوة لي وعاوز يبقا زيها ..
الحقيقه أن قصه نجيبه لا مضحكة ولا كوميدية بالعكس هي مثيرة للحزن والشفقة .

كلنا عارفين أن نجيبة كانت متفوقة دراسياً ، طول الوقت أهلها حاطين عليها ضغط أنها تطلع من الأوائل دايما.
وكان دايما باباها بيقولها (القبة يا نجيبة) لدرجه أنها كانت بتذاكر كمان في الاجازات 🙂‍↕️

وده كان سبب كبير يوصل نجيبه لعقدة الكمالية {Perfectionism}
كانت طول الوقت بتسعى أنها تبقي أشطر طالبة كل تفكيرها أنها تطلع الأولي زي مابابها مأكد عليها
كانت شايفة ذاتها وقيمتها في أنها تبقي أشطر طالبة وطبعاً أهلها كان ليهم دور كبير في ترسيخ الفكرة دي عندها وأنها هتتحب وتتشاف لما تكون مميزة لما تطلع الأولي يعني حب اللي حواليها دايما مشروط بتفوقها.
وطبعاً نجيبه اترسخ عندها أن قيمتها في تفوقها.

خلال مشاهدتنا للفيلم معرفناش نجيبه بتحب ايه .. بتكره ايه ، مواصفات شريك حياتها أيه ، مواهبها أي ... [إحنا مكناش عارفين مين أصلا نجيبه]

وجت لحظة دخول نجيبة الكليه وده بدايه لزيادة الضغوط عليها من {مامتها العريس يا نجيبة}
{بابها القبة ي نجيبة }
... وكأن نجيبة دي إنسان ألي

دخلت نجيبه الكلية وكانت طول الوقت بتسعي لتحقيق رغبة مامتها في العريس ، ورغبه بابها ف القبة..
طبعاً كلنا عارفين نجيبة نشنت على مين.
على أكتر ولد فرحان بلمة البنات حواليه ومقطع السمكة وديلها ..
وهنا طبعاً بدأت عقدة الكمالية [ Perfectionism ] تظهر لأنها شايفة انها شاطرة كمان في الجانب العاطفي واختارت أجمد واغني واصيع ولد في الجامعة ..
وهنا بقا نظرة صحابها ليها بأنها مش كفاية ولازم تغير من نفسها وتعمل لوك جديد، وتهتم بنفسها أكتر عشان تعجب {نبيل}.... وده طبعاً كان ضغط جديد اتحط عليها ..

وبما أن نجيبة مش حابة نفسها صدقت كلام صحابها انها لازم تتغير عشان يحبها نبيل ويقتنع بيها
وفي الآخر نبيل محبهاش ولا حاجه هو بس استغلها عشان يغش منها

نجيبه مش عارفه هي عاوزة أي ، معندهاش ثقه في نفسها ، بتتأثر بأي حد حواليها ، معندهاش شخصية ، ولا استقلال فكري.

والصفات اللي ذكرتها فوق دي كانت سبب واضح تخلي نجيبه تتحول من الشخصية الصايعة الروشة لشخصية مناضلة تسعي للحرية والديمقراطية
وهوووووب بقت نجيبه المتشددة تحت اسم الدين ...
وانتهي الفيلم ونجيبة مش لاقيه نفسها ولا فاهمها ولا عارفة هي عاوزه أي ..
____________________________________
وبعد ما اتكلمت عن حقيقه قصه نجيبه محتاجه أوصل ليك ي عزيزي اكتر من رساله

لازم تبقا فاهم نفسك ومنتمي ليها وإلا هتقع في فخ شخصية نجيبة وتنتمي لأي حد بسهولة وأي حد يغير من أفكارك ويشكلها على مزاجه وتسيب الريح ياخدك ويجيبك بقا ..

مش أي حد ينفع ناخده قدوة ، احنا بشر وطبيعي لينا أخطاء فلما تيجي تاخد حد قدوة خد الجانب الايجابي بس متاخدش الشخصيه ككل ويبقا تقليد أعمي ..

طريقه الحفظ اللي كانت بتتبعها نجيبه هي غلط جداً لان الإنسان مش ألة وأن الحفظ اخرته فشل يعني لازم تفهم وتدرك أنت بتذاكر أي وده هيسهل عليك كتير...
لكل أم وكل أب كفاية ضغط على عيالكم ، مينفعش تحطوا شروط لحبكم ليهم هما عيالكم وهما ناجحين والعكس ..
انتوا بتساعدوهم يدخلوا أي علاقه والسلام عشان بس يدوروا علي الحب وانهم مرغوب فيهم ، وعندهم استعداد يقدموا أي حاجه بس يتحبوا ويكونوا مقبولين
قيمه ابنك أو بنتك مش باللي بيقدموه من نجاح وتفوق قيمتهم في ذاتهم
اسمعوا عيالكم دايما علموهم إزاي يفهموا نفسهم إزاي يحبوا نفسهم ، قربوا منهم واعرفوا... ، بيكرهوا اي، أي بيزعلهم ، بيحبوا أي
ساعدوهم على معرفة ذاتهم..
لازم يبقا عندهم استقلال فكري هما مش ألة ولا جايين يحققوا أحلامكم ..
ربي إبنك وعرفه إزاي يلتزم بمبادئه وقيمه ، ويبقا لي حق في التعبير عن رأيه ..
عشان يبقا شخصية قويه ومستقلة عنده ثقه بنفسه مش شخصية هاشة ..
فكره مغلوطة عند كتير من الأهالي وهي أن سيطرتك على إبنك او بنتك هيحميهم من الوقوع في الأخطاء والحقيقه هما أكتر اشخاص بتتعرض لفعل الاخطاء لأن معندهمش مبادئ ولا بيعرفوا ياخدوا قرار لوحدهم ..
الشخص اللي مش فاهم نفسه ولا فاهم دينه كويس بيبقا فريسة سهلة للاقتناع بآراء اللي حواليه تجيبه وتوديه ، سهل ينحرف أخلاقيا ..
والعكس بيكون إنسان قوي ، واعي، مستقل ، دايما مبادئه وقيمه هتحميه من الوقوع فريسة لأي شخص ولأي رأي...
أكيد نظرتكم لقصة نجيبة اتغيرت واتمني تكونوا فهمتوا الرسالة اللي عاوزة اوصلها ليكم

لم نجد هذه الصفحة!